Covid-19ak ezaugarrituriko testuinguruak arriskuan jarri ditu orain arteko zenbait jokaera, ohitura… Inflexio puntu izan da askorentzat. Bada, lehen zen hura izaten segituko al du gizarteak? Nork daki… Erantzuna heldu bitartean, unean uneko aukerak aprobetxatzea dagokigu. Izan ere, inflexio puntuek, ziurgabetasun egoeren tankeran, aukerak eskaintzen dituzte. Eta horiexek ondo identifikatzea da komunikazio enpresa baten lehen zeregina, osteko urratsak eraginkortasunez egiteko, beti ere. Hain zuzen ere, horretan jardun du Sorland Komunikazio Agentziak, Berrizko Udalaren enkarguari erantzunez.
Atzera begira, Covid-19aren lehen hilabeteez oroitzen gara. Azkenean, koronabirusaren lehen olatuaren beherakadaren ostean, negozioa irekitzeko aukera izan zuten herriko merkatariek, ostalariek… Baina aurreko hilabeteek ohitura aldaketa zuten eraginda herritarrengan. Besteren artean, nabarmen egin zuen gora internet bidezko salmentak, tokiko negozioen kalterako. Testuinguru horretan, herriko negozioen aldeko kanpaina abiarazi gura izan zuen Berrizko Udalak. Hori bai, estrategiak balio gehigarri bat behar zuen izan: bizitza ematen behar zitzaion herriari.
Eslogan irekia, zuhaitzaren adar berrietara zabaltzeko modukoa
Eslogan irekia landu genuen sorlandarrok, orokorra, aurrerago beste arlo eta jarduera batzuetan erabiltzeko modukoa (kirolarekin, turismoarekin, kulturarekin…): Bizi Berriz!.
Finean, ez da hasi eta epe laburrera zentzua galduko duen eslogana, osteko ekintzetan, aurreikusitakoa izan ala ez, erabilgarri izango dena baizik. Argudioetan oinarrituriko kanpaina da, diskurtso sakonekoa.
Baina, zergatik Bizi Berriz!? Bada, merkatari txikiek bizia ematen diote herriari. Eta, aitzitik, herritarrek bizia ematen diete merkatari txikiei. Bizipenak konpartituz ehuntzen dugu gure herria, herri bizi eta dinamikoa, kaleetan bizitza duena. Gainera, bestelakorako aukerak ere eskaintzen ditu esloganak: Berriz (herri izena) eta berriz (berriro, ostera…) hitzekin jolasteko aukera legoke. Hitz joko politak sor litezke.
Esloganaz gainera, irudian eta argudioetan “udaberriaren” kontzeptua iradoki nahi izan zuen Sorlandek; ez, udaberri meteorologikoa, udaberri emozionala baizik. Finean, atzean utzi gura ziren -edo uzten zirela irudikatu, behintzat- koronabirusak luzaturiko negu emozionala, hibernazioa, tristura sentimendua… Eta, horretarako, irudi koloretsuak erabili ziren, bizitza koloretsuaren adierazle, udaberriarena, eta, era berean, esperantzaren eta bizitzaren iradokitzaile.
Komunikazio estrategia, kanpainaren eraginkortasunaren mesedetan
Sorlandarrok hiru arlo bereizi genituen, kanpainaren indarguneak era eraginkorrean aprobetxatzeko: prentsa, sare sozialak eta kaleko euskarriak.
Lehenengoari dagokionez, prentsa oharra eta elkarrizketa egitea proposatu genuen. Horietan, kanpainaren alde emozionala (herriko komertzioen garrantzia, haien ekarpena..) eta arrazionala (zenbat denda diren, zenbat lanpostu, martxan jarri zuten bonu sistemari buruzko informazioa…) azalarazi ziren. Horrez gain, ordainpeko publizitate bitartekoak ere erabili ziren.
Ostera, sare sozialei begirako plangintza ere landu zuen Sorlandek. Kasu horretan, internet modu xume eta lokalean erabili gura izan zen, herritarren partaidetza bultzatzearekin batera, kanpainaren zabalkundean parte hartzeko aukera eskainiz, esaterako. Mezu positiboa helarazi zen, haien ekarpena ikusarazi…
Eta kaleko euskarriak ere egin ziren, besteren artean, kanpainaren irudia indartzeko baliagarri. Denda eta bestelako negozioen aurrean jarri ziren euskarri koloretsu eta deigarriok, merkatari txikiek kaleari bizia emateko duten konbikzio hori nabarmentzeko, kale koloretsuago eta biziago bat erakusteko, merkatari txikiak non dauden iragartzeko… Kanpainako eslogana eta irudia zeramaten euskarriok.
