Kanpaina ekoizpena

Matrikulazio kanpainaren bitartez euskara ikastera ahalik eta jende gehien hurbiltzea da gure xedea, eta horretarako, aurtengoan, AEKren izateko arrazoia ekarri dugu kanpainaren ideia zentralera: euskara eroso bizitzeko aukera izatea.Izan ere, euskaltegiak euskara ikasteko gune erosoak izatea nahi du AEK-k, eta ikasleak handik ateratzean euskara modu erosoan arlo guztietan erabiltzeko aukera izan dezan bilatzen du: lagunartean, familian, lanean, aisialdian….

Behin ideia zentrala zehaztuta, hori grafikoki adieraztea izan da sormen prozesuaren baitan hurrengo pausua. Gure burmuinari plazerra ematen dio puzzleak egiteak, mezu ezkutuak deskubritzeak, interesa pizten digu. Horregatik, aukeratu genuen oinetakoen irudia erosotasunaren ideia islatzeko.

Oinetakoek aurrera egiten laguntzen digute, gurekin doaz oztopoak eta mugak gainditzen, urratsez urrats. Eta noski aukeratzen ditugun oinetakoen arabera bide hori modu erosoago edo deserosoagoan egingo dugu.

Horregatik, euskategian AEKren oinetako laranjak jantzi ondoren gure protagonista prest dago, lagunartean, familian, lanean, aisialdian… bizitzako esparru guztietan, euskara eroso bizitzeko.

Kanpainaren zabalkundearen funtsezko elementuetako bat spot-a izan da. Leloa oinarri bezala hartuta, ideia nagusi hori irudien bitartez transmititzea izan da helburu nagusia.