Skip links

Hezten
Aisialdi hezitzaile euskaltzalea.


Hogeita hamabost urteko ibilbidea egin duen lan-taldea osatzen dute Hezten aisialdi zerbitzuetako kideek: udalekuak eta aterpeak antolatzen, hezitzaileen zein gurasoen formakuntza osatzen, begiraleei tituluak eskaintzen. Dena, euskara ardatz dutela eta hizkuntzaren normalkuntza espezializatua lantzea bereizgarri nagusi.

Pertsonen hazkundea oinarri duten heziketa prozesuak euskaraz diseinatu eta garatzeko zerbitzu eta aholkularitza profesionala eskaintzen die Heztenek administrazioei, ikastetxeei eta familiei. Horretarako osatu dute diziplinarteko lan-taldea; hezitzaileek, soziolinguistek, psikologoek, biologoek, … osatuta.

Ibilbide, bereizgarri eta zerbitzu eskaintza gaurkotu horrekin, aurretik Urtxintxa izenarekin lan egin duen lan-taldeak marka berri bat eraikitzea erabaki du 2022an, eta Sorland agentziako kideok zeregin horretan parte hartzeko aukera eduki dugu. 

Marka azterketa eta estrategia

Marka azterketa egitea izan zen gure lehen egitekoa. Lan-taldeko kide zein bezero eta kolaboratzaileekin hiru talde osatu genituen, xede-taldeotako pertsonekin sakoneko elkarrizketak egiteko, ohi dugunez, markaren hiru ikuspegiak landuz: marka izaera, lehiakortasuna eta irudia

Hezten osatzen duen lan-taldeak eta garatzen dituen egitasmoak balio hezitzaile bereizgarriak, aisialdi arloan ezagutza nahikoa eta xede-taldeetan izen ona dutela ondorioztatu genuen. Oinarri ona, beraz, hiru komunikazio premia nagusiei ekiteko: marka berria sortu eta posizionatzea, komunikazio komertziala indartzea eta marka garapena zein zerbitzu-eskaintza lantzeko komunikazio plana abian ezartzea.

Marka nortasun berbala eta grafikoa

Hezkuntza ez formalean zein euskararen normalizazioan aisialdiak duen garrantzia aditu guztiek onartzen dute. Aisialdiak, edonola ere, gizartean ez du beti hezkuntza arautuak duen prestigioa etorkizuneko herritarrak hezteko eta hazteko garaian.

Izengintza lantzean oso presente eduki genuen gai hori, hezkuntza kontzeptua marka izenera bertara eramanez, marka posizionatzeko. Hezkuntza, gainera, zeregin dinamiko eta etengabe moduan ulertu dadin nahi genuen. Horregatik formulatu dugu gerundioan: hezten. 

Marka posizionamendua indar handiagoz bereizteko, gainera, Heztenek eskaintzen
duen balio erantsi eta onura nagusia eraman dugu claim edo goiburua sortzean, molde
deskriptibo eta esanahi argiarekin: aisialdi euskaltzalea.

Marka grafikoan, berriz, bai logotipoaren sorkuntzan eta baita irudigintzaren lanketan ere, dinamismoa ta harmonia bilatu dugu, kolore eta forma anitzak eta leunak erabiliz, lan taldearen profesionaltasuna, baikortasuna eta diziplinartekotasuna islatzeko asmoz.

Marka garatzen eta komunikazio komertziala indartzen

Behin nortasun berbal eta grafiko hau sortu ondoren, marka aurkezteko eta garatzen hasteko garai zirraragarria heldu da, eta baita marka posizionamendu berriarekin komunikazio komertziala indartzeko zeregin jarraitua ere.

2022ko udaren etorrerarekin egokitu da markaren aurkezpena: udaleku eskaintzaren garai gorenarekin. Marka ezarpena landu dugu, beraz, udalekuetan erabili ohi diren askotariko euskarrietan: motxilak, kamisetak, poltsak, agendak, …

Komunikazio kanal propio nagusia, berriz, webgunea izango da, eta marka lantzamendurako oinarrizko garapena egin ondoren, udazkenean aurkeztuko dugu. Marketing digitalari dagokionez, bestetik, sare sozialak eta euskarri komertzial digitalak ere berritu ditugu, marka diskurtso eta nortasun grafiko berriarekin.

Udazkenean, azkenik, xede-talde nagusiei marka aurkezteko ekitaldia egingo dugu Donostian. Heztenen lankide diren hezkuntza zein hizkuntza gaietako lankide eta adituak ez ezik, administrazio zein irakaskuntza arloko bezeroak batuko ditugu Donostian, orain arteko ibilbidearen eta etorkizunaren ospakizuna ere izango den festan.


Hezten, hezitzaileak garelako.

Aisialdi euskaltzalea, euskararen normalkuntzan espezializaturiko zerbitzu profesionalak eskaintzen ditugulako.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies