Orai
Orai adimen artifizialeko
langune berria jaio da
“Industria eta enpresak lehiakorragoak izan daitezen, administrazioak eraginkorragoak eta herritarren arteko komunikazioa errazagoa.”
Etorkizuna dirudi, baina orai da. Eta guk, Sorland agentziako kideok, marka berri honen sorreran lan egiteko aukera izan dugu
Orai langunea Elhuyar fundazioak sustatutako marka da, NLP teknologiatan (Lengoaia Naturalaren Prozesamenduan) espezializatutakoa. Orai NLP Teknologiak goi-mailako ikerketa eta soluzio teknologiko adimentsuak eta etikoak ekoizten ditu, unibertsitateekin, ikerketa-zentroekin eta enpresekin elkarlanean.
PROIEKTUARI BURUZKO INFORMAZIOA
Elhuyar fundazioak esperientzia handia du hizkuntzen teknologian, eta euskal gizartean ezagutza eta izen handiko aplikazioak aurkeztu ditu azken urteotan: Elia testu itzultzaile automatikoa, Mycroft.eus euskarazko bozgorailu adimenduna edo EITB Nahieran bilatzailea, adibidez. Orain, jauzi eta marka berri bat dator: orai.
\\ MARKA NORTASUNA
Orai langunea osatzen duten kideek 20 urteko esperientzia metatu dute ikerketa akademikoan eta ekoizpen aplikatuan. Lan-talde horren etorkizun-senak eta Elhuyar fundazioaren sustenguak kokatu du Orai bai Europa mailako ikerketa-sarean bai hainbat herrialdetako soluzio teknologikoen ekoizpenerako lankidetzan.
Orai languneko kideen etorkizun-sen hori, baina, gaur egungo lehiakortasunaren testuinguruan frogatu beharra zegoen. Adimen artifizialeko adituekin ez ezik langunearen bezeroekin egin genuen marka azterketa, eta ondoko hiru ondorioak utzi zizkigun: sektoreko adituen onarpena du languneak, bezeroen asebetetze maila handia da, eta, datozen urteetan adimen artifizialak izango duen garapena kontuan izanda, orain NLP zerbitzu lehiakorrak eskainiko dituen marka berria sortzeko unea.
Marka berri hau, gainera, aurretik aipatuez gainera, bere arrakasta kasuak azalduz aurkeztu daiteke: hedabideetan emakumeen presentzia monitorizatzeko proiektua (Emakunde); irudien errekonozimendua eta hizketaren ezagutzaren bidez administrazio, barne-prozesu eta fabrikazio eraginkorragorako aplikazioak (Ulma Construcción); Languedoc-eko okzitanierarentzat eta Gaskoinikako okzitarierarentzat hizketa-sintesirako sistema (Votz proiektua).
\\ BRANDING-A
Sorlandarrontzat aukera paregabea izan da sorrera-sorreratik izatea Orairen lankide. Zerbitzu osoko komunikazio agentzia izanik, zerotik abiatu zen egitasmo anbiziotsu baten marka azterketa egin, marka estrategia zehaztu eta marka nortasun grafikoa zein berbala ideiatu eta sortzeko zeregin aparta izan dugu.
Orai izenak, euskal jatorria eta mundu osorako zabalkundea emango dio marka berriari: orain hitzak, nortasuna ez ezik, esanahia ezagutzen edo ezagutu nahi duenaretzat, gaurkotasun mugagabea ematen dio; amaierako “ai” horrek, berriz, adimen artifizialeko posizionamendua ezartzen du, mundu mailan ingelesezko hitzen laburdurarekin baita ezagun sektorea: artificial intelligence. Hizkuntza ugaritan berdin antzean ahoskatzen den hitza da gainera, eta begientzat zein belarrientzat atsegina.
Izen horri marka nortasun bisuala emateko, Transport New tipografia erabili dugu, O hizkiari borobiltasun osoa emateko Circular Std tipografiarekin uztartuz. O hizkiaren forma zirkular horrekin ideiatu eta sortu dugu ikurra, eta ikur aldakorra eta dinamikoa izan dadin eraiki dugu, etengabeko mugimenduan, adimen artifizialaren sektore osoa eta marka bera bezala. Dinamismo hori bera landu dugu ikurraren zein hondoen koloreak nahastean ere, bizitasun aberatsa landuz: urdin ilun zein argiak, laranja, gorria, morea… Eta, azkenik, argazki, bideo zein irudigintza digitalarekin ere uztartuz.
\\ LANTZAMENDUA
Webgunea, sareak, bideospota eta aurkezpen ekitaldia
Orain marka sortu ondoren, zinezko marka eraikuntza egiten hasteko ordua iritsi da: marka aurkeztu eta ezagutarazteko ekintza plana abian jartzea.
Horretarako, lehenik, lantzamenduari ekin diogu, eta hiru zeregin nagusi izan ditugu: webgunearen eta sareen eduki bisual zein berbalak diseinatzea; bideospot korporatiboa ideiatu eta ekoiztea euskaraz, gazteleraz eta ingelesez; eta aurkezpen ekitaldia antolatzea Donostiako Kursaalen.
“Datozen urteetan adimen artifizialak izango duen garapena kontuan izanda, orain da NLP zerbitzu lehiakorrak eskainiko dituen marka berria sortzeko unea”
